ГА «Беларуская асацыяцыя журналістаў»

Больш за восемдзесят дэлегатаў прымуць удзел у 9-м з’ездзе ГА “БАЖ”, абяруць новае кіраўніцтва, абмяркуюць сучасны стан беларускай журналістыкі і зацвердзяць стратэгію працы на бліжэйшыя тры гады.

У рэгіёнах пачынаюць праходзіць сходы па вылучэнні дэлегатаў на з’езд, прызначаны на 24 красавіка. Тым часам, усе БАЖаўцы могуць правесці адпаведны сход і ў сваёй рэдакцыі або па месцы жыхарства.

20 сакавіка у Магілёве адбыўся рэгіянальны сход мясцовых сябраў журналісцкай арганізацыі, у якім прынялі ўдзел больш за трыццаць сябраў ГА “БАЖ” і запрошаных гасцей з розных рэгіёнаў Магілёўшчыны.

18 сакавіка ў Бабруйску прайшоў сход мясцовых сябраў Грамадскага аб'яднання "Беларуская асацыяцыя журналістаў". Ад мінскага офіса арганізацыі на ім прысутнічала намесніца старшыні арганізацыі Аліна Суравец.

12 сакавіка справаздачна-выбарчы сход адбыўся ў Лунінцы. Сябры ГА “БАЖ” падвынікавалі працу за 3 гады, абралі кіраўніцтва філіі і вылучылі дэлегатаў на будучы з’езд журналісцкага аб’яднання.

У Глыбокім 27 лютага адбыўся сход сяброў суполкі ГА “БАЖ”. На ім вылучылі дэлегатаў на з’езд арганізацыі, абмеркавалі праблемы і планы.

Сход віцебскіх БАЖаўцаў прайшоў 25 лютага. Дэлегатамі на з'езд вылучылі Алену Сцяпанаву, Веру Сцепанішчаву і Паўла Левінава.

12 лютага на сходзе Барысаўскай суполкі ГА “БАЖ” вылучылі дэлегатаў на з’езд ГА “БАЖ” – Аляксандра Зянкова і Анатоля Букаса.

Адпаведны сход 5 лютага прайшоў у маладзечанскай філіі арганізацыі. На сходзе, дзе прысутнічалі старшыня арганізацыі Жанна Літвіна і яе намесніца Аліна Суравец, быў абмеркаваны стан спраў у аб’яднанні, а таксама вылучаныя дэлегаты на справаздачна-выбарчы з’езд ГА “БАЖ”.

У Гродзенскай суполцы сябраў ГА “БАЖ” 22 студзеня адбыўся сход па вылучэнні дэлегатаў на з’езд арганізацыі, які мае адбыцца ў красавіку 2015 года. Абралі Юлію Катаржынскую, Андрэя Пачобута, Вітаўта Рудніка і Віктара Парфёненку.