ГА «Беларуская асацыяцыя журналістаў»

Ці існуе айчынная культур-аналітыка? Калі ёсць аўтары, навошта слухаць крытыкаў? Аналітык – аўтар ці каментатар? Ухваляць ці “мачыць”? Чаго (і каго) баіцца айчынная культур-крытыка? Ці можа аналітыка быць аб’ектыўнай? Дзе шукаць сюжэты для аналітычных выказанняў і што рабіць з крытыкай крытыкі? Як эфектыўна пісаць пра спрэчнае ці тое, што недаспадобы? Чаму, нарэшце, без культурнай экспертызы культпрацэс няпоўны?

На гэтыя і іншыя гарачыя пытанні будзем шукаць адказы ў межах курса па культурніцкай аналітыцы разам з Максімам Жбанковым – культуролагам, журналістам, кіраўніком спецыялізацыі “журналістыка” Беларускага Калегіюма. Друкуецца на сайтах naviny.by, “Наше мнение”, experty.by. Аўтар і вядучы праграм на “Беларускім Радыё Рацыя” і тэлеканале “Белсат”. Аўтар кнігі “No Style. Белкульт паміж Дажынкамі і Вудстакам”.

Удзельнікі курсу даведаюцца:

- Як рабіць аналітыку культуры і чаму гэта варта высілкаў;

- Як зрабіць аналітычны тэкст прывабным і эфектыўным;

- Навошта пісаць пра “нязручных” аўтараў і спрэчныя тэксты;

- Што лепш для аналітыка: аб’ектыўнасць ці суб’ектыўнасць;

- Што трэба ведаць, каб якасна пісаць пра музыку, кіно, літаратуру і арт-падзеі;

- Як і калі карыстацца рознымі фарматамі аналітычнага выказвання (рэцэнзія, калонка, круглы стол, аналітычны артыкул, гонза-рэпартаж).

Усе тэмы курсу будуць разглядацца ў максімальна практычным фармаце, з разборам канкрэтных медыятэкстаў (айчынных і замежных), а таксама практычных заданняў, выкананых удзельнікамі курсу. Фактычна курс будзе працаваць як творчы семінар па засваенні практык аналітычнага чытання культпрацэсу і эфектыўнага выказвання на ягонай падставе.

ДА ЎДЗЕЛУ ЗАПРАШАЮЦЦА:

Журналісты з Мінска і рэгіёнаў, выпускнікі факультэтаў журналістыкі альбо школ маладога журналіста, а таксама студэнты, зацікаўленыя ў пазначанай праблематыцы.

ТЭРМІНЫ:

Курс “Культ-туры: як будаваць аналітычны тэкст” стартуе ўстановачным заняткам 28 сакавіка 2015 года ў Мінску і завяршаецца заключнай сесіяй 30-31 мая 2015 года ў Вільні. Асноўная частка курсу будзе ладзіцца дыстанцыйна на платформе Moodle.

Заяўкі на ўдзел прымаюцца ад сябраў ГА «БАЖ» па электроннай пошце на адрас: baj@baj.by (з пазнакай «Culture») ДА 24 CАКАВІКА 2015 ГОДА.

Ваша заяўка павінная ўтрымліваць:

- Кароткі расповед пра сябе.

- Абгрунтаванне свайго жадання ўдзельнічаць у курсе.