ГА «Беларуская асацыяцыя журналістаў»

Прагнеце змагацца з несправядлівасцю, выводзіць на чыстую ваду злодзеяў, але не ведаеце, як эфектыўна выкарыстаць сваю няўрымслівую журналісцкую энергію?

Журналісцкае расследаванне — найлепшы спосаб выявіць грамадскія хваробы, дапамагчы людзям зразумець іх прычыны і сутнасць, выклікаць імкненне да пераменаў.

На жаль, на гэтым шляху журналістаў падпільноўвае мноства перашкодаў.

Як пераадолець штучныя бар'еры?

Сваім досведам дзеліцца журналіст з больш чым 20-гадовым стажам Мікола Дзябёла.

АНОНС КУРСА

За час майстар-курса кожны навучэнец паспрабуе правесці ўласнае журналісцкае расследаванне. Разам з вядоўцам майстар-курса ён паступова пройдзе ўсе стадыі: ад выбару тэмы расследавання да напісання тэксту.

АПІСАННЕ КУРСА

Ахвотных праводзіць расследаванні сярод беларускіх журналістаў апошнім часам не вельмі шмат. Чаму адбыўся "крызіс жанру"?

Шмат хто з калегаў наракае на закрытасць беларускіх уладаў, якія засакрэчваюць нават самую бяскрыўдную інфармацыю. Сапраўды, здабыць інфармацыю, асабліва тую, якая кампраметуе ўладу ці канкрэтных службовых асобаў, у Беларусі цяжка. Але і замежным калегам, нават з дэмакратычных краінаў, гэта не заўсёды лёгка зрабіць. Кожная ўлада, якая мае свой «шкілет у шафе», заўсёды старанна хавае яго ад усюдыісных журналістаў.

Але, нягледзячы на ўсе перашкоды, праводзіць журналісцкія расследаванні ў Беларусі — рэальна.

Падчас майстар-курса навучэнцы даведаюцца:

— Як знаходзіць крыніцы інфармацыі і кантактаваць з імі?

— Як выбраць тэму журналісцкага расследавання?

— Як працаваць з крыніцамі інфармацыі, каб не пераўтварыцца ў «зліўны бачок» для кампрамату?

— Як не трапіць на лаву падсудных і паклапаціцца пра сваю бяспеку падчас расследавання?

— Як лагічна і зразумела сканструяваць тэкст?

ДА ЎДЗЕЛУ ЗАПРАШАЮЦЦА:

Журналісты з Мінска і рэгіёнаў, якія ўжо маюць прафесійны досвед і хацелі б авалодаць жанрам журналісцкага расследавання.

ТЭРМІНЫ:

Курс “Следства вядуць... аналітыкі: журналісцкае расследаванне” стартуе ўстановачным заняткам 14 сакавіка 2015 года ў Мінску і завяршаецца заключнай сесіяй 30-31 мая 2015 года ў Вільні. Асноўная частка курса будзе ладзіцца дыстанцыйна на платформе Moodle.

Курс утрымлівае не менш за 8 практычных заняткаў, якія трэба будзе выконваць ва ўказаны трэнерам тэрмін.

Кожнаму ўдзельніку курса будзе прадастаўлена магчымасць кансультацыі з трэнерам, а таксама дэталёвы разбор выканання практычных заданняў.

Заяўкі на ўдзел прымаюцца ад сябраў ГА «БАЖ» па электроннай пошце на адрас: baj@baj.by (з пазнакай «Investigation») ДА 10 CАКАВІКА 2015 ГОДА.

Ваша заяўка павінна ўтрымліваць:

1. Кароткі расповед пра сябе.

2. Абгрунтаванне свайго жадання ўдзельнічаць у курсе.