ГА «Беларуская асацыяцыя журналістаў»

Эканамічныя паняцці і працэсы ўсё часцей робяцца істотнымі складнікамі інфармацыйнага поля ў Беларусі.

Як не патануць у акіяне лічбаў, не памыліцца ў эканамічных тэрмінах і на падставе голай статыстыкі напісаць цікавы і зразумелы чытачу тэкст? Як ператварыць рэспубліканскі бюджэт у крыніцу інфармацыі, а ў эканамічных справаздачах прадпрыемстваў адшукаць навіну? Як змяняецца бізнес Беларусі і як бізнесоўцы камунікуюць з уладамі і паміж сабой?

Паспрабуем разам разабрацца ў гэтых пытаннях падчас курсу “Як пісаць пра эканоміку проста” з дапамогай сапраўдных прафесіяналаў.

Падчас занятку ўдзельнікі даведаюцца:

— што стаіць за эканамічнымі тэрмінамі і лічбамі;

— дзе і як знайсці інфармацыю, каб стаць “сведкам” эканамічнай падзеі;

—як не памыліцца ў прагнозах і адрозніць экспертнае меркаванне ад выказванняў дылетанта;

— якую ролю надаць экспертам у матэрыялах пра бізнес і эканоміку;

—як пашырыць эканамічную навіну да ўзроўню рэпартажу;

—як ствараць эканамічныя рэйтынгі;

—як пазбегнуць самых распаўсюджаных памылак;

—як не быць уцягнутым у карпаратыўны канфлікт і якая інфармацыя з’яўляецца камерцыйнай таямніцай.

Пасля заканчэння ўдзельнікі будуць умець:

—выбіраць і раскрываць тэму, не ператвараючы свой тэкст у слоўнік эканамічных тэрмінаў;

—шукаць эканамічную інфармацыю, у тым ліку і ў агульнадаступных крыніцах;

—пісьменна карыстацца статыстычнай інфармацыяй;

—пісаць эканамічныя навіны;

—браць каментары ў экспертаў;

— пісаць рэпартажы з выкарыстаннем прапанаваных шаблонаў, якія з’яўляюцца абагульненнем практыкі работы сусветных эканамічных СМІ.

Мы будзем пісаць свае матэрыялы і аналізаваць чужыя, каб пазбегнуць памылак (якіх, на жаль, нямала ў эканамічных матэрыялах), а таксама абмяркоўваць праблемы, пра якія вы даўно хацелі напісаць, але не ведалі – ЯК.

Да ўдзелу запрашаюцца: Журналісты з досведам працы, выпускнікі факультэтаў журналістыкі альбо школ маладога журналіста, а таксама студэнты з Мінска і рэгіёнаў.

Удзельнікаў чакаюць восем майстар-класаў ад уласных карэспандэнтаў міжнародных агенцтваў навін, а таксама вядомых беларускіх журналістаў.

Лепшыя з навучэнцаў па выніках курсу атрымаюць магчымасць удзелу ў семінары за мяжой у верасні 2015 года.

Апісанне курсу:

Курс «Як пісаць пра эканоміку проста» распачнецца 23 мая і скончыцца 11 ліпеня.

Складаецца з васьмі заняткаў у Мінску і майстар-класу замежнага трэнера ў Вільні, які пройдзе ў верасні.

Заняткі будуць праводзіцца па суботах з 15.00 да 18.00.

УДЗЕЛЬНІКІ:

Заяўкі на ўдзел прымаюцца ад сябраў ГА «БАЖ» па электроннай пошце на адрас: baj@baj.by (з пазнакай «Economy») ДА 19 МАЯ.

Ваша заяўка павінна ўтрымліваць:

1. Кароткі расповед пра сябе.

2. Абгрунтаванне свайго жадання ўдзельнічаць у курсе.