Друкарня адмовілася выпускаць газету «Свободные новости»
Як паведаміў «Нашай Ніве» галоўны рэдактар выдання Васіль Зданюк, у тыпаграфіі проста адмовіліся надрукаваць наклад, ніяк гэта не абгрунтаваўшы.
У сваю чаргу намеснік дырэктара прыватнай тыпаграфіі «Плутас-маркет» Ігар Вішнеўскі патлумачыў сваю адмову паломкай абсталявання. На пытанне, чаму іншыя газеты на тым жа абсталяванні ўсё ж былі надрукаваныя, ён адказаў так: «Ну… рамантавалі…».
Наконт наступнага нумара Вішнеўскі канкрэтна нічога не сказаў.
«У іх вялікі тыраж, а мы яшчэ не зусім разабраліся… Калі малыя наклады, то мы яшчэ можам нешта зрабіць», — вось і ўсё тлумачэнне.
Каб выйсці з сітуацыі, газета тэрмінова шукае іншую друкарню.
«Свободные новости плюс» — адна з самых папулярных недзяржаўных грамадска-палітычных газет Беларусі. Яе наклад перавышае 31 тысяч асобнікаў.