Андрэй Пачобут. Тэрыторыя супрацьстаяння — публічная лекцыя
10 снежня. 18.30. ЦЭХ (пр-т Незалежнасці, 58/6).
Міжнародны кансорцыум «ЕўраБеларусь», Лятучы ўніверсітэт і «Беларускі журнал» запрашаюць на адкрытую лекцыю вядомага беларускага журналіста Андрэя Пачобута «Тэрыторыя супрацьстаяння. Краіны Усходняга партнэрства паміж «рускім светам» і еўраінтэграцыяй».
«Украінскі крызіс» стаў пікам канфлікту двух цывілізацыйных перспектываў і паставіў пад сумнеў базавыя прынцыпы суіснавання ў свеце, у якім мы жылі апошнія паўстагоддзя. Ніхто сёння не ведае, чым усё скончыцца, якім будзе наш свет у будучыні. Як спрычынілася да гэтага крызіса ініцыятыва Усходняга партнэрства? Яе стваральнікі ўпарта падкрэслівалі, што яна не мае антырасейскага характару, але гэтыя сцверджанні не паўплывалі на жаданне расейскіх уладаў кантраляваць жыццё ў суседніх краінах.
Чым еўрапейская ініцыатыва Усходняга партнэрства так напалохала Маскву? Ці можна было пазбегнуць канфлікта двух інтэграцыйных праектаў, еўрапейскага ды еўразійскага, ці гэты канфлікт быў наканаваны? Якія каштоўнасці ды перспектывы прапануюць гэтыя два праекты краінам былога СССР? Як украінскія падзеі паўплывалі на інтэграцыйныя праекты, і як рэагуюць на гэтыя падзеі краіны Усходняга партэрства? І якія магчымасці да манёўру ёсць у Беларусі? Пра гэтыя сутнасныя пытанні разважае ў сваёй лекцыі Андрэй Пачобут.