ГА «Беларуская асацыяцыя журналістаў»

Прадстаўнікі журналісцкай прафесіі на Гродзеншчыне кажуць, што адчуваюць “на сабе” тыя судовыя рашэнні, якія выносяць па справах іх калег. За апошнія некалькі месяцаў у Беларусі адбыўся амаль дзесятак судовых працэсаў з удзелам незалежных журналістаў.

Суды над гродзенцамі Андрэем Мялешкам, Алесем Дзянісавым, Алесем Залеўскім, Уладзімірам Хільмановічам, Міхалам Карневічам прымусілі многіх гродзенскіх калег задумацца пра сваю працу.

Гродзенскі карэспандэнт TUT.BY Аляксей Шота:

- Самая складаная сітуацыя на дадзены момант у журналістаў, якія не працуюць на афіцыйна зарэгістраваныя СМІ. На жаль, у нас вельмі архаічная сістэма. І ўлады, і праваахоўныя органы лічаць журналістамі толькі тых, хто працуе на нейкія СМІ – тобок, з пункту гледжання закона, нават такія буйныя медыі, як TUT.by – гэта не СМІ. І гэтым, канешне, карыстаюцца. Падаецца, на першы погляд, што ёсць усяго некалькі чалавек, якіх пастаянна “марынуюць”, а для астатніх нібыта ўсё нармальна, няма ніякіх праблем. Але насамрэч ціск на аднаго чалавека – гэта ціск на ўсю прафесію, на сам від дзейнасці. І тое, што кагосьці штрафуюць, а камусьці проста не хочуць даваць каментар – гэта звёны аднаго ланцужка.

Незалежны журналіст Ян Роман: 

- Прысуды, якія выносяць незалежным журналістам, – у прыватнасці, трэці штраф Андрэю Мялешку – сведчаць пра тое, што ўлада па-ранейшаму пераследуе прадстаўнікоў незалежных СМІ і перашкаджае даносіць інфармацыю да людзей. Я думаю, што “Радыё Рацыя” на памежжы слухае даволі шмат людзей. Мяркую, што ўлады на гэтым не спыняцца, што гэта не апошні штраф, і не выключана, што далей яны будуць ужываць нават больш жорсткія захады да журналістаў.

Журналіст “Радыё Свабода” Міхал Карневіч:

- Відавочна, што нешта адбываецца: за нядоўгі прамежак часу прайшло ўжо каля дзесятка судоў. Улада да чагосьці рыхтуецца, і першая яе задача – пазбавіць журналіста права на прафесію, перакрыць каналы паступлення інфармацыі з нашага рэгіёна ў знешні свет. Гэта відавочна, але хто гэта робіць – вось пытанне.