Суд над кнігарняй «Логвінаў» пачнецца 5 студзеня

"Наша Ніва"

Суд над кнігарняй «Логвінаў» распачнецца 5 студзеня (панядзелак) па  адрасе Мінск, вул.Акадэмічная 15, корпус 1. Пачатак а 15:00.

Як пісалася раней, культавы інтэлектуальны адрас беларускай сталіцы апынуўся пад пагрозай знікнення.

Пазапланавая падатковая праверка прыйшла ў кнігарню «ЛогвінаЎ» у пачатку снежня. Памяшканне апячаталі, а дакументацыю ўзялі на вывучэнне. Па выніках праверкі кнігарню распячаталі. Але вынеслі суровае пакаранне за працу без ліцэнзіі Міністэрства інфармацыі.

Па выніках праверкі кнігарні налічылі парушэнняў амаль на 1 мільярд рублёў – такой была сума продажаў кніг за год. Спаганяць гэтыя грошы будуць праз суд.

Уласнік кнігарні Ігар Логвінаў адзначыў, што за год ён восем разоў звяртаўся ў Мінінфарм па ліцэнзію. І кожны раз яму адмаўлялі. Адна з адмоў была звязана з тым, што Ігар… няправільна ўказаў паштовы індэкс.

Летась Міністэрства інфармацыі забрала ў выдавецтва «ЛогвінаЎ» ліцэнзію за выпуск альбома «Прэс-фота Беларусі 2011».

Ад самага з'яўлення кнігарня з’яўляецца месцам шматлікіх кніжных прэзентацый і гранічна значнай для нацыянальнай культуры і літаратуры прасторай.